ZU KA RUI

Zu hi eng nge a nih chu kan hria, engtianga hnathawk thin nge a nih tih pawh kan hre tlang theuhin a rinawm. Kei ve teh lul hian kum 4 kal ta khan engtin tin emaw in tur ka tawng ve nawlh mai a, mi fate pawhin an thei alawm tih tanchhanin ka theih ve ngei ringin ka rui ve ta poh chu a nia. Ka thiamloh vang nge pawh ka hre chuanglo a, zu in thiam ti a sawi tur zofate zingah hian ka hriatloh phah chiang khawp mai.

Samsei

       Kan hma zawn thing buk hnuaiah chuan an thu teuh a, samsei chhelo tak tak awm ve chu ka thiante nen chuan kan sawi zui zel a. Duhthu sama titi kan sep lai chuan sa….sa…..sam….sam……se…se…..sei….sei……. dang rawn kal thar chuan ka thiante titi vawrhna lam atang chuan ka beng parh tak, hlai hlep hlup tak mai chu a pawt her sawk a. Hmuh thianglo hmu ang maiin ka mit lah chu a meng kuau ringawt a, khap nachang lah chu a hre der lo. Eng rim emaw hriat tum ni awm takin ka hnar lawk luau mai chu a parh hurh hurh bawk a. Ka thiante thusawi kawi khat mah ka ngaihtuahnaah chuan a leng tawh hek lo. Mahse ‘tunge a rawn kalpui saw? Ka va khawih silawng dawn amaw ni le,’ ti a rilru ka neih lai tak chuan a taka chantir theih chu sawi loh, chu Samseii vang ringawt chuan chakna thahrui reng reng ka lo nei tawh awzawng silo tih ka hrechhuak thut a. (Engvangin nge chu ngaihtuahna pawh chu ka neih theih le, ka lo thik hman pek anih chu.!). Amah en ngawih ngawih chunga suangtuahna nena thlir zui vawng vawng bak chu chutihlaia tihtheih dang ka neih awm reng reng ka hre lo.