MILEM

Class ka awm peih tawh loh avang chuan Student Recreation Hall-ah ka lut a, tu vak mah an lo awm lo hlauh. Dawhkan dawh zawm sei pui maiah chuan ka bag chu ka nghat hnawk a, thutthlengsei-ah chuan ka thu a, ka bag chu ka hai rawk rawk a. Pencil leh nawhreh ka phawrh a, ka file-a paper pakhat la awm chu ka lachhuak bawk a. Tu lem nge ka ziah dawn pawh hre lo chuan a sam atangin ka han ziak tan ta a.

Ka thai ka thai a (chu paper-a a thla ni awm tak chu ka chhuifiah ni berin ka hria), a nghawng chen vel a tawi chuan a sam chu a sei ru phian a, a mam han bawk a, a hair band chuan a chilh fel pawr thlep a, a inhmeh reuh lutuk. A chalsam rual hmeih chuan a mit meng mawi tak chu a hliah lo tawk chiah a, rual taka a mithmul pawh chu a si che che a, chu aia a sei chuan a mawi dawn silo. A biang ki lek lek, enchiana langsar chuang hlei lo chu ka thai thla zel a. A hnar ngul kual mawi tak chu a mit leh mit inkar atang chuan a in vuah thla zân a, a mit lah chu fiah tak chung hian a phelh deuh phang a. A hmui pan mawi tawk tak chu a ha to thuah chuan a rawn do pawng deuh hlek a, a nalh em em bawk. A biangsum lang mawi tawk tura a kha be invuah kual raih mai lah chu a hmel ti duhawmtu a ni, a khabe kual hnuaiah chuan tlem a chuang deuh hlek bawk a.

A dar in bâng liam pial nalh zet chu a kawr hak chuan a hliah chang chang a, a lang thui lutuk lo. A kawr hak ( a par, a ban tlang leh a nghawng kual a uk a ribbing awm ) chu midangin ha ve se a fel thlep ang a a zo der ang, mahse a inhmeh a sin. A tawk chiah ni mah se a tawk lo lek lek a, a hnawk ru deuh hlek a, tlemin a thawl deuh em aw ti ila a chuangliam hmuh tur a awm si lo. A kawr nghawng chu bial zau deuh huau mah se a lang tam chuang lo, a sa inphut mawi tawk tak chuan a lang tam tur a hnawhkhat ni maw…! A banbul lian ang reng tak atanga in vuah thla a ban sei zar tawpa a kut chum biang mai te chu mawi tawk tak ani, chu aia a tet chuan a mawi awm tawp silo a. A tuihal changa a intur ni ngei hi bottle pawl-dal hian tui a keng bawk. A kutzungpui dinglamah chuan zungbun a bun tel. Bag sen a ak a, a ni, bag sen ngei mai ani a ah ni. A bag sen ah chu adar atangin a inbâng liam a, a zak hnuaiah chuan a thil ah phawrh mai theih turin a inbâng kual rem thlap mai.

Kekawr uk a ha a, a mal mum lian nalh tak lang chiang tur erawh chuan a mar ve peng pawng lo a. A zuih mawi tawk chiah, a tlâng chu zung hnih bawk vel a hlai hian a thlep bawk a. A pen zawng chuan a ngalrêk  tlem lang tur hian a inhlim chhing leh hlek zel. Pheikhawk kaih nei a bun a, a pheikhawk hnuai chu a uk tho, chhah deuh tak, inchi hnih vel a ni a, a keartui zawn tlemin a sang hret. Tah chuan a kaihna chu a inkilh kual de thep bawk a. Ka tho thut a, ka milem ziah chu ka la lawk a, khawilam nge ka pan dawn pawh hre lo chuan ka kal nal nal a. Campus hma lama April kung hnuaia thutthleng indawh phei zur maiah chuan ka va thu ta vang vang a.

Chu ka milem ziah hmelpu chu ka hma zawnah rawn kal dawn tlata hriatna ka nei a, ka lek ka lek a, ka hawi kual ta chiam a. Canteen leh Class Room lam chu ka melh tawn zak zak a, khawi emaw zawk zawk kawngka atanga lo chhuak tur ni tlat hian ka ngai a. Ka ngaihtuahna chu mak tak a ni, mahni milem ziah ngei mai a tak chang thei hlei lo han zawn chiam mai chu.! Zawng hmu pawh ni teh reng ila ka tan erawh a lem mai chauh ani kumkhua awm si a. A lem kara a tak zawnchhuah chu awl viau pawh nise ka zawn erawh a tak nge a lem pawh ka chian ngam tawh hauh lo. Lem ziah mak tak zawng a nih ka ring hial e ka ti. A vai zawng zawng zahve aia tlem hret chu a hnawk vel vek a, a zahve aia tam hret  dang erawh a fel nuaih bawk si. A dang la bang chu sawi belh ngailo hian a inhmeh em em si.

Rei fe ka thut hnu chuan canteen lam atang chuan an lo chhuak dam dam a, ka thle phei hê a. A lo tel ve ta tlat mai, hming lamna bu leh eng eng emaw a rawn pawm phei bawr leh hnawk a. Ka lem ziah nen khan in ang tawh hek lo, mahse a inthuamna zawng zawng a danglam buarchuar fel leh thlep tho. A rawn pen phei leh kauh kauh a, ka zâwn a rawn thleng, min kal pel dawn tak ngial a. Ka tho nawlh a, a hma zawn takah chuan chak deuhin ka kal a, a luhna tur Room ah chuan ka luh khalh a. Thlanglam tukverh bul tlar hma lamah chuan ka lo thu ta vang a. Minute 30 chhung vel chu ka hmu leh dawn chiang alawm. Tui em ema thu a sawi hliam hliam lai chu ka lo en kar ang a, ka ngaithla ang a (‘ngaithla awm takin ka awm ang a’ ka tihna). ‘R’ lam ri fiah chiah lo hian ‘ti r’u’ a ti puam leh telh ang a. Kan hriatthiam leh hriatthiamloh min rawn zawt pahin nelawm tak hian a rawn meng bial leh pap ang chu.